2Cor 9 | NdeIBE | STEP | Akusweleki ukuba ngililobele mayelana lalokhukusebenzela abangcwele.

2 Corinthians 9

1 Akusweleki ukuba ngililobele mayelana lalokhukusebenzela abangcwele. 2 Ngoba ngiyakwazi ukutshisekela kwenu ukuba lisize, njalo kade ngizincoma ngakho kwabase-Makhedoniya, ngibatshela ukuthi kusukela nyakenye lina e-Akhayiya lalizimisele ukunikela; njalo ukutshiseka kwenu kukhuthaze inengi labo ukuba baphathise. 3 Kodwa ngithuma abazalwane ukuze ukuzincoma kwethu ngani ngale indoda kungabi yize, kodwa ukuba libe ngabalungiseleleyo, njengoba ngathi lizakuba linjalo.

4 Ngoba uma abanye baseMakhedoniya besiza lami bathole lingalungiselanga, thina – kungasatshiwo lutho ngami – singayangeka ngethemba ebesilalo.

5 Ngakho ngibone kufanele ukukhuthaza abazalwane ukuba balethekele mandulo baqedise amalungiselelo esipho esihle elasithembisa sona. Ngalesosikhathi sizakuba sesilungile njengesipho esihle, hatshi esinikelwe ngomona.

Ukuhlanyela Okunengi

6 Khumbulani lokhu: Lowo ohlanyela okunengi uvuna okunengi. 7 Umuntu ngamunye kanike lokho amise enhliziyweni yakhe ukukunikela, kungabi luhonono loba ngokubanjwa ngamandla, ngoba uNkulunkulu uthanda onikela ngokuthokoza. 8 Njalo uNkulunkulu ulamandla okwenza umusa wande kini, ukuze kuthi ezintweni zonke ngezikhathi zonke, lilakho konke elikuswelayo, lizakuba lokunengi kuyo yonke imisebenzi emihle.

9 Njengoba kulotshiwe ukuthi: “Uhlakazele izipho zakhe kubayanga ezindaweni zonke; ukulunga kwakhe kumi kuze kube laphakade.”

10 Lowo onika umhlanyeli inhlanyelo lesinkwa sokudla uzanika njalo aqhelise isiphala senu senhlanyelo, andise lesivuno sokulunga kwenu.

11 Lizanothiswa ngezindlela zonke ukuze liphane mathuba wonke, kuthi ngathi ukupha kwenu kulethe ukubongwa kukaNkulunkulu.

12 Umsebenzi lo eliwenzayo kawuqedi ziswelo zabantu bakaNkulunkulu kuphela, kodwa ugcwele amazwi amanengi okubonga uNkulunkulu.

13 Ngenxa yomsebenzi eselizibonakalise ngawo, abantu bazamdumisa uNkulunkulu ngenxa yokulalela okukanye lokuvuma kwenu ivangeli likaKhristu, kanye lomusa wenu ekwabelaneni labo kanye labanye futhi.

14 Ekulikhulekeleni kwabo, izinhliziyo zabo zizakuba kini, ngenxa yomusa ongelamkhawulo uNkulunkulu alinike wona. 15 Kabongwe uNkulunkulu ngenxa yesipho esingeke sichazwe.